屈穎妍寫咗本《怪獸家長》，直指有啲家長變咗怪獸教仔女走火入魔，引起好大迴響，瞬即登上暢銷書榜，唔少家長當佢係偶像。早排反對國民教育行動搞到嘭嘭聲，佢咁啱去咗日本旅行，對國教亦唔係好抗拒，所以冇喺自己專欄寫文評論表態，點知大批email跟住湧到，部分惡形惡相，用語極之兇狠，似足文革批鬥，好得人驚。
有電郵起佢底細，話佢媽咪係左派工會「老左」，佢又讀過左派學校，其實係共產黨嘅無間道。又有人指佢同老公林超榮幫過振英哥站台，今次唔反對國教，係因為收咗振英哥嘅掩口費，實情係梁營奸細。
其他來電雖然冇咁狠辣「扣帽」，但都極唔客氣，例如指佢冇反對國教，唔似佢風格；半句話都唔講，係咪得咗絕症呀；有人仲話以後罷睇佢嘅專欄，杯葛佢。
屈穎妍受到一輪文革式批鬥，驚都未驚過，但感到非常痛心，心諗點解香港搞成咁o架，竟然連沉默都有罪，於是喺專欄寫咗篇《沉默的自由》，向班友回咗一句：「幾時開始，香港變得連沉默的自由都沒有了！」又慨歎「如今社會奇怪地撕裂，我在報紙爬格子十多年了，忽然有感，今天，是最沒言論自由的時代。」
篇文出街後，估唔到引起好多反應，更估唔到，回應嘅好多同佢有共鳴，向佢表示支持。據屈穎妍講，佢哋有家長、教師、大學教授同學生，多數都話已忍咗好耐，篇文章講咗佢哋嘅心聲，凡事可以有不同觀點，唔反對國教唔等於無恥、冇良心，就係罪過！有個媽咪咁寫：「激烈言論何嘗不是洗腦？我兒子每日都聽，他已經不能理性分析是非，只會滿腹牢騷。」
呢班「沉默多數」其實人數唔少，只不過唔似屈穎妍咁，有自己地盤可以表達，惟有啞忍，例如有一個中學教師，喺facebook寫咗段嘢，話自己唔同意國民教育獨立成科，但教育下一代認識中國好應該，點知畀該校校友及學生留言轟到翻肚，當佢係紅色走狗，由於壓力太大，呢位教師終於取消個facebook account。另外又有大專學生話，自己唔同意罷課反國教，冇參與行動，結果被同學排擠。
反國教愈走愈偏激，教育界內亦開始有反彈，有一位知名親子專家同屈穎妍講，見到部分家長推BB車帶一兩歲細路去示威，覺得好唔妥，咁同洗腦有乜分別，只係利用細路搞行動啫。反國教已開始變質，成為咗政治手段，所以佢已決定唔再參加呢類活動。
屈穎妍當年同反國教家長領袖陳惜姿一齊入《壹週刊》做記者，兩支筆寫到出晒名，但今時今日對反國教嘅態度就好唔同。佢話：「最恐怖係，唔反對都係罪。我寫咗咁多年文，未試過唔寫都畀人鬧！」
講開反國教行動，有政圈中人留意到，學民思潮中秋節晚吹雞班幾百人操去CY山頂大宅「賀節」，搞到人過節都唔安寧，做法已過咗火，就算兩軍對陣，過年過節都應停戰一晚吖；次日班友去衝擊金紫荊廣場，黃之鋒成個小長毛咁，亦令人覺得佢變咗，唔多對路喎！
