主埸之死：財經林峯
今期湊熱閙，開精電國際(0710)，講吓呢隻明星工業股的投資價值。
有一種上市公司，大股東係股壇老雀，炒殼炒股炒風炒電，鑊鑊飛沙走石，路過之地吋草不生，道上風景，卻是唔少底褲都冇著的師奶股東亞婆散戶，個個木口木面。呢類公司，財經茄哩啡永遠唔敢掂，因為坐庄者太犀利，自問冇本事在對家手指罅揾食。
物以類聚，一個財技超凡的公司主席，炒炒貢十幾年，忽然喪搭個形象包裝一流的行政總裁，Chok住Chok住同你講乜嘢工業革命，順叔戒心會更加大，股壇大龍鳯，來來去去，都係作個故仔揾班財經演員埋位，財演越有型，食水越深，咁大件靚仔扮蛤毑周街仆嚟仆去，咪玩啦。
精電行政總裁蔡東豪哥哥，無需多介紹，簡直係財經茄哩啡的偶像，如果呢個世界有「財經演員」，咁叫Tony Tsoi哥哥做「財經林峯」可謂當之無愧，周身刀張張利，踎屎塔都出哲學，戴上邊張臉具都咁靚仔，雖然有時略嫌有少少形象潔癖，一大堆乜能嘢「最後一代知識份子」、「以係自己係文化人的企管人」，唔係個個明，冇所謂，最緊要型，重點係冇人會講得膠覺得佢Chok，星級財演與財茄之分，此之謂也。
順叔觀察到幾有趣一點，蔡東豪哥哥（下稱「Tony Chok」或「Chok生」）作為上市公司管理層的一面，似乎唔係咁多人了解（好多當「Chok生」係偶像的，唔少係從不炒股的正義師奶，或者世界觀未染銅臭的少男少女），對「Chok生」的老闆高振順，認識更少。
咁「Chok生」老闆係乜人呢？如果有興趣知道，留意吓過去十幾年圍繞佢老闆在股壇的人和事，例如一度入主亞視的吳征、在大陸影壇關係千絲萬縷的「文化商人」董平（見順叔舊作「孖你孖孖」）、仲有大名頂頂的中信國安咁，多多少少會知道，「Tony Chok」究竟同緊乜人打工。
當然啦，最可靠的消息，來自阿「Chok生」自己把口。「Chok生」睇得上眼又「欣賞」的人，唔多，包括緬甸女神昂山素姬、已拉柴的南非總統曼德拉咁。2008年所謂金融海嘯，成日唱衰不務正業上市公司的「Chok生」，失驚無神秘撈，炒燶唔知「乜Link衍生工具ELN」，精電狂蝕幾億港銀，不過「Tony Chok」近千萬港元年薪年年照袋，難怪後來接受傳媒訪問時，大大聲講，對佢老闆的「欣賞有增無減」。原來，在唔會講大話的「Tony Chok」眼中，佢老闆同昂山素姬、曼德拉都係同類人物，咁偉大，咁值得欣賞，明晒。
貨乾易炒，精電股價，過去兩年大約升兩倍，瞇埋眼睇股價，分分鐘係最佳表現香港工業股，最新市值24個億港元，往績市盈率僅僅雙位數字，息率超過6厘，完美無倫，財經林峯多粉屍，形象好人緣佳，近年唔少外資投行分析員，將本來無人吼的精電，放入研究範圍，佢老闆出得年薪千萬，請「Chok生」做生招牌，博分析員寫報告，吸引芬佬圍飛入貨，公司市值增加十零廿個億，已經值回票價。好喇，既然精電表現咁好，蔡東豪哥哥貢獻又咁大，純粹從投資角度出發，散戶就要留意吓，「Tony Chok」的種種副業，對精電有唔會產生不良影響。（之前有兩個金融「兼職王」人版，一個叫范鴻齡，一個叫張震遠。）
首先，斷估任何一個老闆，都唔會鐘意自己伙記太多兼職，一間正正經經做生意的上市公司，更加唔會有個行政總裁，長期兼職寫財經評論，指手劃腳，大佬，家事國事天下事日久日點評，今日得罪生意拍檔，後日得罪商場朋友的朋友，佢老闆點做生意呀？所以，如果一間上市公司的行政總裁，日日在報紙互聯網吹水唔抺咀的話，一係呢間上市公司根本冇投資價值，一喺呢位行政總裁的評論冇任何觀賞價值，是但一樣。
去到呢度，Tony Chok的另一位老闆就要出場：CY Lai。眾所久知，Chok生做咗壹傳媒(0282)筆陣重炮多年，到2012年中左右（確實日子唔能記得，待查），蘋果日報財經B疊，開始出現一個由Chok生另一個變身丘亦生坐鎮「金融雲端」的「金融中心」專版，當時條街傳緊，CY Lai出手甚豪，一個月一百萬港紙犒賞Tony Chok，呢條亦係Chok生另一重要副業主場新聞的重要水喉（後面仲有冇其他力場、豬腸的水喉灌水，唔知），條數可能吹大咗，打個五折都有半球一個月（一年接近100萬美金），主場新聞的其他創辦人，最新透露，主場新聞的營運資金，大部分來自Chok生與CY Lai在「金融中心」的合作計劃，涉及金額每月數十萬計云云，可見主場新聞後面金主之一，就係壹傳媒CY Lai也，點解精電老闆高振順，每年俾千萬港銀Chok生之餘，又會長期容忍自己夥計，同全港最惹火的傳媒老闆行埋，搞乜嘢豬腸新聞，日日燒自己後欄（精電在大陸設廠），搲頭。最近CY Lai跟班Mark Simon的個人電腦資料疑似外泄，唔少政客全職拋個身出嚟，又瞓街又絕食，都係收幾十萬（港銀，下同），Chok生做吓兼職揾人寫吓稿，個個月幾十萬，巴閉。
肥佬黎在台灣被人跣鑊金變賣資產失敗之後，壹傳媒開始炒人削減開支，CY Lai對蘋果全職夥記都仲算有少少良心，一刀剢咗落主場新聞條水喉，「金融中心」專版一星期五日變一日，冇幾耐，就傳出主場新聞創始股東內部不和的消息，是耶非耶？（股東不和傷兄弟感情，又會唔會另一個主場新聞草草收皮的原因？）
2014年7月26日，Chok生一紙飛機文，宣佈主場新聞執粒，距離檔嘢兩歲生日只有兩日（打工仔做滿兩年先有遣散費），一個聲稱香港最多人睇的新傳媒網站，滾水淥腳拉閘封舖，全港嘩然，一邊話Chok生作為佔中「死士」之一，要為民主大業製造悲情，谷人上街革命；另一邊，天滅中共，白色恐怖，中共打壓新聞自由咁。一個腦細胞未完全死亡的人，稍為冷靜退一步諗諗，都知道兩邊講法，各有道理，同時亦將香港呢局棋過度簡單化。Chok生坐得呢種位置，點會咁簡單，就一個問題的考慮，絕對唔會係「因為XXX，所以YYY」的一條直線，三言兩語可以解釋完全，而係好似圍棋象棋高手咁，一步之外，必有各種唔同後著，一個動作，同時解決幾個問題或者幾個對手，又話者係種種得失計過度過的決定。
簡單舉幾個可能因素：
［考慮A］當然係錢，壹傳媒條水斷咗，CY Lai私人醒俾泛民的政治捐款又黃埋，本來夠圍皮，家陣要自己出錢， Chok生雖則在精電年薪千萬，不過要個個月揻幾十餅嘢出嚟維持正義，Chok生明顯肉痛。Chok生話檔嘢從來未支平衡（乜原來咁大使費），一個雞棚又要咁多錢？唔知有冇可能，Chok生幾乎壟斷創辦主場新聞的光環之餘，又撳住主場條數唔俾其他股東知道，令其他創始股東有所不滿呢？至於話主場新聞點解冇廣告，曉，咪玩啦，呢個不在本文討論範圍，大家試吓問香港是但一個新聞傳理系教授講師，睇吓邊個夠胆用「客觀」形容主腸新聞，就會知道答案。
［考慮B］種種所謂互聯網新媒體，個個創辦人都話自己出錢，即係自己燒自己春，真係咁多人願意做新聞自由烈士，香港一天都光晒啦。間間網媒都捱緊，隨時有人執粒，根據近年香港傳媒的行規，做唔掂就呃幾句「天滅中共」或者「689下台」的新興傳統，主場新聞如果遲啲執粒，俾隔離台搶先一步新聞自由烈士上身，咁就冇咁轟動冇咁型仔啦。
［考慮C］主場新聞叫做收咗皮，不過重新開檔的成本，接近零，財經林峯夠型，轉頭揾另一班熱血中坑或青年，曉以民主大義，改變經營模式，再起爐灶，搞檔豬腸新聞又好，牛雜電台都好，分分鐘聲勢更加浩大，家陣喊苦喊忽的網民，話唔定到時唔食唔爆房都要捐錢俾Chok生東山再起添。
［考慮D］Tony Chok做投資銀行出身，好似順叔某網友（未得巴打同意先隱其名）所言，摺埋主場新聞只係金融佬的一套「兩面對沖」。對住大陸的米飯班主，Chok生可以大大聲講已經執咗主場新聞，繼續做精電生意；另一邊，扮晒受害人，繼續煽民，一千條豬腸新聞評論，都及唔少「香港冇主場」一單新聞咁轟動。佔中得米，Chok住Chok住出嚟攞彩，佔中冇市場，咪繼續做生意囉。
［考慮E］2014年的香港，同2004年何其相似，十年前董建華腳痛落台之前，反對派亦成功煽動大型群眾運動，亦出現電台名咀疑似名咀被政治打壓而輪流封咪的情況，董落曾上，戰況激烈，發動政變的時候，搵軍隊控制電台電視台，其實亦係對新聞自由的終極干預（見「次輪好戲」），十年人事小門中，人臉依舊發噏風，重點係，當日「被封咪」的兩位名咀，其後不但冇被滅聲封殺，而係更加大聲，先後成為影響力更大的立法會代議士，一位擁有自己電台，一位掀起政壇新風，奇。按照同樣政治軌跡，查實要恭喜Chok生，幾年後能量必定更大，更上層樓，大器可待。
當然，中共使橫手白色恐尻怖Chok生，可能性亦都存在，但唔好忘記，阿Chok生早在舊年，已經「決志」，做「佔中十死士」，重覆：係「決志做死士」嘩，頂你，財經林峯即係財經林峯，「死士」喎，型到佢！
政治呢家嘢，財經茄哩啡識條春咩，只係想問一句，蔡東豪哥哥既然已經有做「死士」的決心勇氣，當主場新聞面對政治壓力時，點解又會失驚無神「我恐懼」？邊樣先真呀，呢種「死士」，兒嬉咗少少喎，吹脹。以為「無痛佔中」咁著數，咁不如試吓冇菌中出啦老友。
Chok生戴住「佔中死士」個頭盔，威，在主場新間搖旗納喊咗成年，相信唔少當財經林峯係偶像的靚仔，受其正氣感染，決心投身政治運動最前線，黃竹坑烈士就係咁嚟，好喇，家陣佔中革命一觸即發，血氣方剛者黄花崗烈士上身，扎行馬準備劈友戮敵之時，本應身先士卒的「死士」財經林峯，竟然臨門一腳同你講「我恐懼」，言下之意，唔通係：「唔好意思，我要收收皮，你哋衝先」？嘩，咁都得，你老妹都問會你仲係咪男人啦……
嗱嗱嗱嗱嗱，財經茄哩啡絕對相信Chok生的人格，唔會係Chok住Chok住扮正義、煽（跣）班靚仔去衝去死、轉頭又揾師奶散戶笨實的冚家鏟古惑仔，既然決得志做「佔中死士」，一定唔會咁仆街，借啲意走數（大家記住呢位「死士」，佔中時會否蒲頭，就知道形像潔癖的財經林峯的素顏矣）。
Chok生作為精電老總，高調介入政治活動公民抗命，預咗俾差佬拉留案底，冇錯，係就係好正義，從銅臭角度去睇，就係終極的不務正業、妄顧股東利益。所以Chok生都係時候，辭去精電及其他上市公司商業職務，全程投入做全職佔中「死士」，精電股東就要小心喇，股價升咗咁多，Chok生作為精電靈魂，無論以行政總裁身份被差佬拉，定係決志劈炮唔撈，精電股價都似係向含苞散方向前進。
所謂左手又係肉，手心又係肉，究竟點先可以同時滿足精電及CY Lai兩個老闆（講多次，後面仲有冇其他力場、豬腸水喉射住，唔知），財經茄哩啡一路都諗唔明，早排同憤怒荷馬等幾個神經經濟學家，講開佔中的經濟邏輯，忽然頓悟。
真正的公民抗命，講緊以最大化的「個人成本」及最低化的「社會成本」，爭取最高化「社會利益」，當年印度甘地絕食，就係公民抗命的最佳案例（去到最極端就係自焚）。好喇，家陣佔中版本的公民抗命，掉轉晒，講緊以最低的「個人成本」綑綁埋最高的「社會成本」，作為爭取「社會利益」的工具。後生仔佔中，「個人成本」未必會好低，越多人攤分，「個人成本」可能越低，不過「個人利益」相信就唔會好多，不過，會唔會有一少部份高人，在鼓動年青人發動革民之時，本身亦有最大化的「個人利益」落袋呢？
財經林峯摺咗主場新聞，如果再辭埋精電老總職位，就可以更加凸顯自己付出「個人成本」的高昂，可以更Chok，最懷打算，去壹傳媒打工斷估亦唔會差得去邊，講到尾，CY Lai都六張幾，形象太差，政治資產減值得八八九九，都係時候退休，在香港，五十歲出頭，形象好能量高，最有資格做CY Lai接班人的，有兩個，Chok生係其中之一，無論佢下一步做乜，請記住，到呢一刻，Chok生都係左手收CY Lai銀兩做民主革命，右手又收精電老闆千萬年薪搞「工業革命」，最後的「死士」，唔會死錯人的。
財經林峯係大眾偶像，分析精電前景，預咗俾人插，喂喂喂，西環有冇觀眾呀？五毫子稿費唔該。
